is / en / dk

15. október 2014

Félag kennara í Menntaskólanum í Reykjavík hefur sent frá sér ályktun þar sem áformum menntamálaráðherra um að stytta nám til stúdentsprófs er mótmælt harðlega. Félagið mótmælir jafnframt þeirri „staðleysu að stytting náms úr fjórum árum í þrjú feli ekki í sér minni menntun“ og bendir á að íslenskir nýstúdentar eigi nú þegar í erfiðleikum með að fá nám sitt metið sem fullnægjandi undanfara háskólanáms erlendis.

Þá er menntamálaráðherra hvattur til að „viðurkenna að fjölbreytt námsframboð og sveigjanlegur námshraði laðar nemendur fremur en ella að framhaldsnámi þar sem flestir finna nám og námsframvindu við hæfi,“ eins og segir í ályktun félagsins. 

Ályktunin er svohljóðandi: 

Reykjavík, 15. október 2014

ÁLYKTUN FÉLAGS KENNARA VIÐ MENNTASKÓLANN Í REYKJAVÍK

Félag kennara Menntaskólans í Reykjavík mótmælir harðlega fyrirhuguðum áformum menntamálaráðherra um að stytta nám til stúdentsprófs og þeirri skerðingu á námi sem það hefur í för með sér.

FKMR mótmælir því sem augljósri staðleysu að stytting náms úr fjórum árum í þrjú feli ekki í sér minni menntun.

FKMR bendir á að nú þegar eigi íslenskir nýstúdentar í erfiðleikum með að fá nám sitt metið sem fullnægjandi undanfara háskólanáms erlendis og mótmælir því að nú eigi að gera samanburð við það sem gengur og gerist á Vesturlöndum enn erfiðari.

FKMR líst illa á að steypa skuli alla framhaldsskóla í sama mót þannig að nám á Íslandi verði einsleitara en það er þegar orðið og leggur þess í stað til að gera hvern skóla sjálfstæðari. Félagið hvetur ráðherra til að viðurkenna að fjölbreytt námsframboð og sveigjanlegur námshraði laðar nemendur fremur en ella að framhaldsnámi þar sem flestir finna nám og námsframvindu við hæfi.

Að lokum fordæmir FKMR menntastefnu sem byggist einvörðungu á skammsýnum fjármálahugmyndum og hvetur yfirvöld menntamála til þess að líta á menntun sem framtíðarfjárfestingu einstaklinga og samfélags í hagrænu og menningarlegu tilliti.


Fyrir hönd FKMR
Guðjón Ragnar Jónasson formaður

 

 

Tengt efni