is / en / dk

19. Nóv. 2019
05. Nóvember 2019

Þann 19. nóvember næstkomandi stendur FLÍSS, félag um leiklist í skólastarfi fyrir málþingi um mikilvægi leiklistar í skólastarfi. Síðasta vetur kannaði FLÍSS stöðu leiklistarkennslu í skólum á Íslandi. Á málþinginu mun Ása Helga Ragnarsdóttir formaður FLÍSS fara yfir niðurstöður þeirrar könnunar en það er ljóst að staðan er ekki ásættanleg.

Í nýrri aðalnámskrá er mikil áhersla lögð á þá lykilhæfni sem nemendur eiga að tileinka sér. Samkvæmt námskránni ætlumst við m.a. til að nemendur séu skapandi, vinni sjálfstætt, sýni frumkvæði og geti miðlað þekkingu sinni og leikni og flutt mál sitt skýrt og áheyrilega og tekið þátt í samræðum og rökræðum. Rannsókn sem embætti Landlæknis lét gera nýlega sýnir einnig að það vantar mikið uppá að grunnskólakennarar nái að kenna nemendum næga félags- og tilfinningafærni, sem hjálpar þeim að þekkja og skilja sínar eigin tilfinningar og annarra og eiga farsæl samskipti við aðra. Leiklist í grunnskólum á ekki að snúast um það að ala upp leikara heldur sýnir sig einmitt að nemendur ná að tileinka sér mikið af þessari lykilhæfni og tilfinningafærni í leiklistarstofunni og nýta hana í lífinu almennt og öðru námi.

Markmið málþingsins er að ná til skólastjórnenda um mikilvægi þess að auka vægi leiklistar í skólastarfi eins og námskráin segir til um. Við hvetjum því skólastjórnendur og kennara og aðra sem hafa áhuga á efninu að koma og kynna sér málið betur og taka þátt í umræðunni.

Málþingið verður Í IÐNÓ, þriðudaginn 19.nóvember kl. 17.00 – 19.00

Fundarstjóri er Vigdís Gunnarsdóttir leikkona og leiklistarkennari.

Dagskrá málþingsins:

  • Stjórn FLÍSS bíður gesti velkomna.
  • Ása Helga Ragnarsdóttir, leiklistarkennari: Hvert stefnum við? Staða leiklistarkennslu í grunnskólum landsins.
  • Ásgeir Beinteinsson, fyrrum skólastjóri Háteigsskóla: Krunkar hermikrákan – sjálf?
  • Jóhannes Nordal Eggertsson, nemandi í MH: Æska mín í leiklist.
  • Una Ragnarsdóttir, nemendi í 10.bekk Hagaskóla syngur lag úr Mary Poppins sem skólinn setti upp á síðasta vetri.
  • Rannveig Þorkelsdóttir, leiklistarkennari: “Í leiklist getur maður verið maður sjálfur og þú þarft ekki að sitja allan tímann”.
  • Freyja Kristinsdóttir nemandi í 10. bekk Hagaskóla: Hvernig ég fann “mig” í leiklist.
  • Starkaður Pétursson, leiklistarnemi: Örlög eða nám?
  • Ilmur Kristjánsdóttir, leikkona: Hvernig leiklistin bjargaði lífi mínu.
  • Spunaatriði frá nemendum.
  • Spurningar úr sal.
     

Tengt efni