is / en / dk

24. október 2018

Konur, sem starfa í Kennarahúsinu, ganga út klukkan 14:55 í dag, miðvikudaginn 24. október, vegna kvennafrís. Konur í Reykjavík munu fylkja liði og mæta til samstöðufundar á Arnarhóli undir kjörorðinu Breytum ekki konum, breytum samfélaginu. 

Síðastliðið ár hafa frásagnir kvenna af áreitni, ofbeldi og misrétti á vinnustöðum undirstrikað að brýnt sé að tryggja öryggi kvenna og jaðarsettra hópa á vinnumarkaði. Nú er nóg komið, konur eiga að vera óhultar heima og óhultar í vinnu!

Samkvæmt nýjustu tölum Hagstofu Íslands um launamun kynjanna eru meðalatvinnutekjur kvenna 74% af meðalatvinnutekjum karla. Konur eru því með 26% lægri atvinnutekjur að meðaltali. Samkvæmt því hafa konur unnið fyrir launum sínum eftir 5 klukkustundir og 55 mínútur miðað við fullan vinnudag frá kl. 9–17. Daglegum vinnuskyldum kvenna er því lokið kl. 14:55. Með þessu áframhaldi ná konur ekki sömu launum og karlar fyrr en árið 2047 – eftir 29 ár! Eftir því getum við ómögulega beðið!

Baráttufundir eru haldnir um allt land, sá stærsti á Arnarhóli en hann hefst kl. 15:30. Dagskrá fundarins er glæsileg – ávörp flytja Jóhanna Sigurðardóttir fyrrverandi forsætisráðherra, Sólveig Anna Jónsdóttir formaður Eflingar, Claudie Wilson lögfræðingur hjá Rétti og Áslaug Thelma Einarsdóttir baráttukona. Kvennakórarnir Vox feminae, Katla, Léttsveit Reykjavíkur og Múltíkúltí – fjölþjóðlegur sönghópur kvenna, munu taka lagið saman. Þá koma Reykjavíkurdætur fram, Karitas Mörtudóttir Bjarkadóttir flytur ljóð og leikkonurnar Aldís Amah Hamilton, Ragnheiður Steindórsdóttir og Esther Talía Casey flytja örverk eftir Yrsu Þöll Gylfadóttur. Fundarstýrur eru Ilmur Kristjánsdóttir og Saga Garðarsdóttir. Tveir táknmálstúlkar þýða fundinn og stór skjár verður einnig á sviðinu.

Á fundinum verða lesnar upp kröfur samstöðufunda kvenna á Íslandi til stjórnvalda, atvinnurekenda, stéttarfélaga og samfélagsins alls.
Staðfestir fundir eru boðaðir á Akureyri, Bifröst, Dalvík, Grundarfirði, Ísafirði, Mývatnssveit, Neskaupstað, Ólafsvík, Reyðarfirði, Selfossi, Skaptárhreppi og Varmahlíð en fleiri munu ugglaust bætast í hópinn. 

Vefurinn kvennafrí.is

 

Tengt efni