is / en / dk

16. Maí 2018

Foreldraverðlaun Heimilis og skóla 2018 voru afhent í 23. skipti við hátíðlega athöfn. Verkefnið „Láttu þér líða vel“ hlaut foreldraverðlaunin en Guðrún Gísladóttir, kennari í Vogaskóla, fer fyrir verkefninu sem ýtt var úr vör fyrir tveimur árum. Fulltrúar nemenda, foreldra, kennarar og skjólastjórnendur eiga aðkomu að verkefninu en lögð er áhersla á geðrækt og mikilvægi þess að byrja við upphaf skólagöngu að veita nemendum verkfæri til að stjórna eigin líðan og hegðun. Í skólanum hefur m.a. verið boðið upp á jóga, slökun og núvitundarþjálfun, ásamt fræðslu sem nýtist börnum bæði í skólanum og heima fyrir. Markmiðið er að vinna gegn andlegri vanlíðan, s.s. kvíða, lágu sjálfsmati og þunglyndi sem rannsóknir sýna að er því miður vaxandi vandamál meðal grunnskólabarna. Áhersla er lögð á að styrkja sjálfstraust og sjálfsmynd nemenda og sýna fram á fjölbreytileika samfélagsins þar sem allir eiga jafnan rétt á að vera þeir sjálfir.

Dugnaðarforkur Heimilis og skóla 2018 er Birgitta Bára Hassenstein sem hefur verið formaður SAMFOK, samtaka foreldra grunnskólabarna í Reykjavík, í fjögur ár og þar áður sat hún í stjórn samtakanna.

Hvatningarverðlaun Heimilis og skóla 2018 hlaut verkefnið „Allir með – tölum um skólamenningu á Íslandi“ sem unnið var í samstarfi SAMFOK og Móðurmáls – samtaka um tvítyngi. Verkefnið gengur út á að virkja foreldra barna af erlendum uppruna í foreldrastarfi.

Lilja Dögg Alfreðsdóttir, mennta- og menningarmálaráðherra, afhenti verðlaunin ásamt Önnu Margréti Sigurðardóttur, formanni Heimilis og skóla. Þetta árið bárust Heimili og skóla 33 tilnefningar og tilnefnd voru 19 verkefni til Foreldraverðlauna og 11 dugnaðarforkar. Allir tilnefndir fengu viðurkenningarskjal frá Heimili og skóla.

Frétt frá Heimili og skóla.
 

Tengt efni