is / en / dk

04. Maí 2017

Félag framhaldsskólakennara tekur skýra afstöðu gegn fyrirhugaðri sameiningu Tækniskólans og Fjölbrautaskólans við Ármúla. Félagið harmar þau vinnubrögð sem hafa verið viðhöfð í málinu. Þetta kemur fram í ályktun sem Félag framhaldsskólakennara sendi frá sér rétt í þessu. 

Jafnframt segirí ályktuninni: „Á Íslandi hefur stefnan verið sú að allir hafi jöfn tækifæri til náms og að menntun sé hluti af velferðarkerfinu en ekki vettvangur markaðsvæðingar. Það er verulegt áhyggjuefni ef ætlunin er að einkavæða menntakerfið einn skóla í einu, eins og þessi aðgerð ber með sér.“

Ályktunin hljóðar svo:

Félag framhaldsskólakennara tekur skýra afstöðu gegn fyrirhugaðri sameiningu Tækniskólans og Fjölbrautaskólans við Ármúla. Rekstrarform þeirra og áherslur eru ólíkar. Tækniskólinn er einkarekinn skóli með framlagi frá ríkinu í eigu nokkurra félagasamtaka og hefur starfað frá 2008 en Fjölbrautaskólinn við Ármúla er ríkisskóli, stofnaður 1981.

Á Íslandi hefur stefnan verið sú að allir hafi jöfn tækifæri til náms og að menntun sé hluti af velferðarkerfinu en ekki vettvangur markaðsvæðingar. Það er verulegt áhyggjuefni ef ætlunin er að einkavæða menntakerfið einn skóla í einu, eins og þessi aðgerð ber með sér.

Ástæða þess að framhaldsskólar eru opinberar stofnanir er sú að hlutverk þeirra er að stuðla að alhliða þroska allra nemenda og virkri þátttöku þeirra í lýðræðisþjóðfélagi með því að bjóða hverjum nemanda nám við hæfi, óháð efnahag og félagslegri stöðu. Hætt er við að þessar hugmyndir fari forgörðum ef þær eru að fullu settar í hendur einkaaðila.

Félag framhaldsskólakennara harmar þau vinnubrögð sem viðhöfð hafa verið um að það sem kalla má yfirtöku Tækniskólans á Fjölbrautaskólanum við Ármúla. Stór hópur nemenda og fjöldi starfsfólks bíður nú í óvissu um framtíð sína. Það þolir enga bið að kalla þennan hóp saman og upplýsa ítarlega um framhald málsins.

Félag framhaldsskólakennara kallar eftir skýrri aðgerðaáætlun og rökstuðningi fyrir þessari ákvörðun með tilliti til rekstrarlegra og faglegra sjónarmiða.

 

Tengt efni


Warning: array_filter() expects parameter 1 to be array, null given in /home/kiis/public_html/modules/mod_articles_relative/helper.php on line 35

Warning: array_flip() expects parameter 1 to be array, null given in /home/kiis/public_html/modules/mod_articles_relative/helper.php on line 42