is / en / dk

22. október 2015

Stjórnendur í grunnskólum á Akureyri hafa sent áskorun til bæjarráðs Akureyrarbæjar um að beita sér í samningaviðræðum Skólastjórafélags Íslands (SÍ) og samninganefndar Sambands íslenskra sveitarfélaga (SNS). Áskorunin er svohljóðandi:

Undanfarna mánuði hafa staðið yfir samningaviðræður SÍ og SNS vegna kjarasamninga skólastjórnenda en samningur þessara aðila rann út 31. maí 2015. Skólastjórar grunnskólanna á Akureyri eru afar ósáttir við stöðu samningamálanna enda hafa þau dregist mjög á langinn og síðustu misseri í raun verið í bið. Skólastjórnendur grunnskóla hafa verið langt fyrir neðan almenna stjórnendur í launum og starfsumhverfið hefur breyst verulega á síðasta áratug hvað varðar stjórnun, skipulag og faglega forystu. Ástæður þeirra breytinga eru m.a.:

  • breytt lagaumhverfi grunnskólans
  • innleiðing laga og reglugerða sem m.a. tengjast íslenskri málstefnu, jafnréttisstefnu og fleiri stefnumarkandi málefnum
  • áhrif stjórnsýslu- og upplýsingalaga, m.a. á mannaráðningar
  • ný Aðalnámskrá grunnskóla og innleiðing hennar
  • skóli án aðgreiningar
  • aukin samvinna við alla hagsmunaaðila sem koma að skólastarfinu
  • auknar kröfur sveitarfélaga varðandi stjórnun og rekstur skóla
  • samrekstur og sameiningar skóla
  • starfsmannahald og starfsþróun
  • kröfur um bætt skipulag vinnuumhverfis
  • meiri kröfur til sýnilegrar og sannanlegrar skilvirkni á öllum sviðum í kjölfar aukinna mælinga og mats á skólastarfi, t.d. í samræmdum prófum, PISA, í skólapúlsinum o.s.frv.
  • aukið samstarf við leik- og framhaldsskóla
  • fjölgun rannsókna háskólanema og fleiri aðila
  • ábyrgð á öllum rekstri skólans bæði faglegum og fjárhagslegum
  • kröfur frá foreldrum vegna félags- og tilfinningalegra vandamála nemenda sem hefur fjölgað og orðið flóknari
  • nýjar kröfur og margra vikna starf við vinnumat í nýjum kjarasamningi FG og SNS.

Þessar breytingar á starfsumhverfi og umsvifum starfsins hafa ekki verið virtar til launa. Margir kennarar eru komnir upp fyrir deildarstjóra og aðstoðarskólastjóra í launum og margir stjórnendur sjá það nú sem leið til bættra kjara að hætta í stjórnun og ráða sig í frekar til kennslu.

Við erum afar ósátt við þessa stöðu og skorum á bæjarráð Akureyrarbæjar að gefa skýr skilaboð til SNS um að beita sér fyrir því að stjórnendur fái að minnsta kosti sambærilega hækkun á launum og kennarar hafa fengið þannig að enginn stjórnandi verði með lægri laun en kennari.

Stjórnendur í grunnskólum Akureyrarbæjar
 

Tengt efni