is / en / dk

31. Mars 2014

Fjölsóttur baráttufundur Félags framhaldsskólakennara og Félags stjórnenda í framhaldsskólum krefst þess að ríkisstjórn Íslands geri raunhæfar ráðstafanir til að leysa kjaradeilu framhaldsskólakennara og ríkisins. Svo hljóðar upphaf ályktunar sem samþykkt var samhljóða á fundi framhaldsskólakennara fyrr í dag. Um fimm hundruð manns komu saman í Verkfallsmiðstöðinni í Framheimilinu og um þrjú hundruð framhaldsskólakennarar fylgdust með fundinum og tóku þátt í samþykkt ályktunarinnar á netinu. Ályktunin er hér í heild sinni: 

Ályktun samþykkt á baráttufundi Félags framhaldsskólakennara og Félags stjórnenda í framhaldsskólum 31. mars 2014

„Baráttufundur Félags framhaldsskólakennara og Félags stjórnenda í framhaldsskólum, haldinn í Framheimilinu 31. mars 2014. kl. 13.00, krefst þess að ríkisstjórn Íslands geri raunhæfar ráðstafanir til að leysa kjaradeilu framhaldsskólakennara og ríkisins“ 

Fundurinn krefst þess að laun félagsmanna verði samanburðarhæf við laun viðmiðunarstétta. Tryggt verði að launaþróun verði sú hina sama og hjá viðmiðunarhópum og að ríkið skuldbindi sig til að tryggja nægilegt fé til reksturs framhaldsskólanna svo sómi sé að.

Fundurinn skorar á ráðherra mennta- og fjármála að styðja við menntun og skólastarf í landinu með því að beita sér fyrir því, að samninganefnd ríkisins fái nú þegar auknar heimildir til að semja við samninganefndir Félags framhaldsskólakennara og Félags stjórnenda í framhaldsskólum.

Baráttufundur Félags framhaldsskólakennara og félags stjórnenda í framhaldskólum lýsir fullum stuðningi við samninganefndir félaganna í yfirstandandi kjaraviðræðum við ríkið. Mikilvægt er að nú náist fram eðlilegar og réttlátar leiðréttingar á kjörum framhaldsskólakennara. Ennfremur kallar fundurinn eftir því að stjórnvöld sýni vilja í verki til að leysa kjaradeiluna strax svo skólastarf skaðist ekki frekar en orðið er.

 

 

Tengt efni