Kennarasamband Íslands

28. apr. 2008

Grunnskólakennarar undirrita kjarasamning

Samninganefndir Félags grunnskólakennara og Launanefndar sveitarfélaga undirrituðu kjarasamning klukkan hálf tvö í húsakynnum ríkissáttasemjara í dag. Núverandi samningur rennur út 31. maí nk. og laun grunnskólakennara hækka um 25 þúsund krónur 1. júní.

Fréttatilkynning frá samninganefndum Félags grunnskólakennara (FG) og Launanefndar sveitarfélaga (LN) í tilefni undirritunar kjarasamnings aðila þ. 28. apríl 2008.

Undirbúningur að gerð þess kjarasamnings sem undirritaður var í dag hófst fyrir um einu og hálfu ári þegar Ásmundur Stefánsson, ríkissáttasemjari, leiddi saman á óformlegan hátt núverandi formenn samninganefnda aðila. Tilgangurinn var að finna leiðir til að bæta samskipti aðila og taka upp ný vinnubrögð í kjaraviðræðum. Aðilar eru sammála um að ætlun ríkissáttasemjara hafi tekist með ágætum. Í marsmánuði á síðasta ári var gert samkomulag um tímasetta aðgerðaáætlun. Á grundvelli hennar hefur annars vegar verið unnið að sameiginlegri stefnumótun kennara, stjórnenda og fulltrúa sveitarstjórna í málefnum grunnskólans og stendur sú vinna enn yfir. Sérstök opinber kynning á þessari stefnumótunarvinnu fer fram fljótlega. Hins vegar var myndaður starfshópur sem framkvæmdi nákvæma könnun á launakjörum grunnskólakennara. Skýrt kom fram í þessari könnun að launakjör grunnskólakennara eru töluvert lakari en háskólamenntaðra samanburðarhópa. Sú niðurstaða er óumdeild af hálfu samningsaðila.

Þegar formlegar kjaraviðræður hófust í febrúarmánuði sl. voru aðilar sammála því að í upphafi yrði samið um sameiginleg markmið og gengu þeir samningar greiðlega. Fyrsta markmiðið er að grunnlaun og starfskjör kennara verði jöfnuð við laun annarra háskólamenntaðra starfsmanna sem sinna sambærilegum störfum, þannig að laun og önnur kjör kennara verði samkeppnisfær við kjör samanburðarhópa. Þetta þýðir m.a. að hækka þarf sérstaklega laun yngstu kennara og byrjenda vegna þess að staða þeirra var mun lakari en viðmiðunarhópa.

Í þeim samningi sem nú hefur verið undirritaður er þessari jöfnun og leiðréttingu náð í þremur áföngum. Þann 1. júní nk. hækka laun kennara um 25.000.- kr. á mánuði. Með því er að hluta verið að færa launataxta að greiddum launum þar sem yfirborganir hafa átt sér stað. Við upphaf næsta skólaárs þ. 1. ágúst bætast 9.000.- kr. inn í launatöflu auk þess sem uppbyggingu hennar er breytt til hagsbóta fyrir yngri kennara. Lokaáfanga að framangreindu marki er síðan náð 1. október nk. þegar öll starfsheiti hækka um einn launaflokk. Þessar þrjár hækkanir fyrir þá sem ekki hafa notið yfirborgana nema samtals um 15-23% á grunnlaun eftir aldurshópum. Þann 1. janúar 2009 hækka laun síðan um 2,5%. Á þessu ári má vænta að launakostnaður sveitarfélaga vegna þessa samnings hækki um 1,2 milljarða króna.

Núverandi samningur rennur út 31. maí nk. og tekur þá þessi samningur við og gildir í eitt ár. Aðilar hafa einnig samið um að sá samningur sem þá tekur við renni út á sama tíma og kjarasamningar annarra stéttarfélaga starfsmanna sveitarfélaga. Þannig næst að tengja saman samningstíma grunnskólakennara og annarra starfsmanna sveitarfélaga.

F.h. samninganefndar FG                     F.h. samninganefndar LN

Ólafur Loftsson, formaður                    Karl Björnsson, formaður