Kennarasamband Íslands

25. jún. 2012

Nemendum gróflega mismunað með frumgreinanámi

Í maí sl. gaf Ríkisendurskoðun út skýrslu með mjög góðri úttekt á frumgreinanámi þeirra þriggja skóla sem reka slíkar deildir: Háskólans í Reykjavík, Háskólans á Bifröst og Keilis ehf. Námið á sér næstum hálfrar aldar sögu á Íslandi og var upphaflega hugsað fyrir mjög lítinn hóp iðnskólagenginna einstaklinga sem hygðust leggja stund á verk- eða tæknifræðinám. Síðustu ár hefur námið breyst í einhvers konar óformlega hliðstæðu stúdentsprófs og stendur nú öllum til boða sem náð hafa 20 eða 25 ára aldri. Þar að auki hefur það á allra síðustu árum verið skilgreint sem vinnumarkaðsúrræði sem miðar af því að bæta stöðu atvinnulausra á vinnumarkaði. Námið er þó hvorki starfstengt nám né nám sem miðar að sjálfsstyrkingu eins og námsúrræði Vinnumálastofnunar eiga að gera og rúmast ekki innan laga nr. 27/2010 um framhaldsfræðslu. Þá kemur fram í skýrslunni að Ríkissjóður veitir árlega framlög vegna kennslu í frumgreinadeildum og því væri eðlilegt að yfirvöld menntamála hefðu faglega aðkomu að náminu, áhrif á innihald og þróun þess og sinntu faglegu eftirliti með því. Ekkert væri heldur því til fyrirstöðu að frumgreinanáminu væri sinnt innan framhaldsskólanna. Komið hafa fram vísbendingar um að nemendur frumgreinadeilda hafi ekki jafn góðar forsendur til að stunda almennt háskólanám og nemendur hefðbundinna framhaldsskóla og sumir nemendur hafi tæplega forsendur til að hefja háskólanám. Það er engu að síður allt lánshæft frá LÍN og því gætir ójafnræðis meðal nemenda því almennt framhaldsskólanám til stúdentsprófs er ekki lánshæft.

Í ályktun frá Félagi framhaldsskólakennara, en þar er útgáfu skýrslu Ríkisendurskoðunar fagnað og tekið undir tillögur sem þar er að finna, er áréttað að ekki er farið að lagakröfum um menntun og réttindi kennara í framkvæmd frumgreinanámsins, nemendum er gróflega mismunað og ótækt að háskólarnir bjóði upp á nám á framhaldsskólastigi án eftirlits, skipuleggi innihald þess og verðleggi að geðþótta.